නැගීම අමාරු ය. බැසීම ලේසි ය. බොහෝ දෙනෙක් අමාරු ඒවා වලට කැමති නැත. ඒ නිසා ද නගින්නට ඔවුහු පැකිළෙති.
නැග්ගොත් බහින්න වෙනවා ය. ඒ නිසා ද තවත් සමහරු නගින්නට කැමති නැත. නැග්ගහම වැවෙන්නටත් ඉඩ තිබෙන්නේ ය. ඉහළට නැග්ග ප්‍රමාණය වැඩි වුනහම වැටුනොත් රිදෙන ප්‍රමාණය ද වැඩි වෙනවා ය. ඒ නිසා නැග්ගත් වැඩි දෙනෙක් ඉහළට යන්නට බයේ අතරමග නතර වෙනවා ය.
බය නැති අය ඉහළ යනවා ය.
ඉහළ යන්නට ඔවුන් නොකරන දෙයක් නැත. කාගේ හෝ කකුළකින් ඇද බිම දමා හෝ ඉහළටම යනවා ය. ඉහළට ගියහම පහළ ඉන්න අය පේන්නේ නැත. වටපිටාව මනරම් ය. සිසිල් ය. සියල්ල තමන්ට යටත් ලෙස දැනෙනවා ය.
ඉහළට ගිය අය වැටෙන්නේ නැතිව ඉන්නට හැකි හැම දෙයක්ම කරනවා ය. බහින්නේ නැතිව ඉන්නට ද ඔවුන් නොකරන දෙයක් නැත.
ඉහළ ඒ තරමට ආකර්ෂණී ය.
ඉහළ යන අය බහින්නට හිත හදා ගෙන යෑම හොඳ ය. මක්නිසා ද යත් මොනවා කළත් කවදා හෝ බහින්නට වෙන නිසා ය. මහේල ජයවර්ධන නම් ක්‍රිකට් ක්‍රීඩකයාට මේ අවබෝධය තිබුනේ ය. ඒ නිසා ඔහු ළඟදී ටෙස්ට් ක්‍රිකට් පිටියෙන් බැස්සේ ය. ගෞරවාන්විතව බැස්සේ ය. ක්‍රිකට් ලෝලීන්ගේ නොමද ආදරය මැද ක්‍රිකට් පිටියෙන් සමුගත්තේ ය.
සමහරු බහින්නට හිතුවේ පහළින් බහින්නේ නැත්තේ මොකදැයි අසන විට ය. ඒ ද ඒ හඩ ඇසුනේ නෑ වගේ කාලයක් සිටීමෙන් ද පසු ය.
සමහරු නොබැස ඉන්නට කරන දැගලිල්ල දුටුවිට නගින්නේ මොන එකට දැයි සිතෙන්නේ ය.
නැග්ගොත් බහින්න වෙනවා ය. එසේ නොකර සදාකාලිකව රැඳෙන්නට කාටවත් බැරි ය. ඒ වුනාට බහින්නට වෙන වෙලාවක් එන බව ඒ වෙලාව එන කම් බොහෝ අයට තේරෙන්නේ නැත.
ඒ බව දැන නැග්ග තරමට ජීවිතය සුන්දර වනු ඇත්තේ ය.
වචන සෙල්ලම් 
One thought on “මහේල නම් බැස්සේ ය – නැගීම සහ බැසීම”