අනූ නමය නොහොත් 99

එකේ (1) වටිනාකම තේරුම් ගන්නට නම් ක්‍රිකට් තරගයක 99 ක් ලකුණු රැස් කර තිබිය යුතු ය. ඒ 99 ක් රැස් කරත් ඉතිරි එක අඩු නම් වාර්ථා පොතට එක් වන්නේ නැති නිසා ය. 99 වැදගත් වන්නේ මෙසේ එකේ වටිනාකම එයින් අපට උගන්වන බැවිනි. ඒ ඇරෙන්නට එහි වටිනාකමක් නැත.

99 න් වඩාත් වැඩ ගත්තේ වෙළෙන්දන් ය. එයිනුත් මගේ මතකයට එන්නේ සපත්තු වර්ගයකි. රු 500 සපත්තු කුට්ටම රු 499.90 ට අඩුකරමින් අපට කරන්නට යන වියදම ගැන සැහැල්ලුවක් ලබා දුන්නේ ඒ සපත්තු කොම්පැනිය ය. ඒ නිසා එවැනි වෙළඳ මිලක් දුටුවිට ..ටා ප්‍රයිස් යයි කියන්නට එකල මිනිස්සු පුරුදු වී සිටියහ. ඒ අනුව අපට කිව හැක්කේ අගට බින්දු තියෙන ඉලක්කමකට වඩා අගට 9 තියෙන ඉලක්කමකින් වාසි ලබන අය ද සිටින බව ය. එහෙම බැලුවහම නම් හිතෙන්නේ හැමවිටම අනූ නමය නරක නැත කියා ය.

සෙන්ටිග්‍රේඩ් අංශක 99 ට රත් කළාට සාමාන්‍ය වායුගෝල පීඩනය යටතේ වතුර නටන්නේ නැත. වතුර නටන්නේ එය අංශක 100 ට පැමිණියාට පසු ය. එසේ නටමින් පිටකරන වාෂ්පවලට කෝච්චියක් ඇදගෙන යා හැකි ය. ඒත් 99 ට රත්වූ වතුරවලට ඒ හපන් කම කළ නොහැකි ය. එහෙම බැලුවහම 99 දෙකේ කොළයට දා 100 උඩ දාන එක හරි ය. කඩ ඉම පසු කළ පසු සියල්ල වෙනස් වන හෙයිනි. 99 එවැනි කඩ ඉමකි.

විභාගයේ දී ලකුණු 99 ගත්තහම අහන්නේ ද ඉතිරි එකට මොකද වුනේ කියා ය. 99ක් ම ගත්තේ කොහොමදැයි අහන අය විරල ය. ඒ අතින් බැලුවහම 99 මිනිසුන් වූ අප සිතන්නේ කෙසේදැයි තේරුම් ගැනීමට ද අපටම උදව් කරන්නේ ය.

99 පිළිවෙළක් ඇති සංඛ්‍යාවකි. එය සෑදී ඇත්තේ අපූරු සම්බන්ධයකිනි.

99 = 2³ + 3³ + 4³

අනූ නමය චිත්‍රපටිවලට බෑන්ඩ් කණ්ඩායම්වලට රෙස්ටුරන්ට්වලට සිංදුවලට නමක් ලෙස ද භාවිතා කර ඇත. ඒ අතින් නම් 99, ඊට එකක් වැඩි 100ට වඩා ජනප්‍රිය ය.

අසම්පූර්ණ බව සමග සමගිවීම මිනිසෙකු සම්පූර්ණ කරන්නේ යැයි ඔබ හිතන්නේ නම් ඇත්තටම 99 හි ඇති අඩු 1 ඔබ අමතක කරනු ඇත. 100 ක් ඇති එකාට වඩා එසේ සතුටු වන 99 ක් ඇති එකා සම්පූර්ණ ය. සැබෑ ලෙස අඩුව ඇත්තේ 1ක පමණෙකැයි වටහා ගෙන ඇත්තේ ඔහු /ඇය නිසා ය.

අසම්පූර්ණ බවම මිනිසෙකු සම්පූර්ණ කරන්නේ ය.  සම්පූර්ණ නම් එතැන ඇත්තේ මිනිසෙකු නොවේ.

ඉලක්කය 100 කර ගමු. ලැබුනේ 99 නම් එය 100ක්ම තරම් බව හඟිමු. 99 ත් 100 ත් තුළ ඒවාට ආවේණික යහපත් භාවයන් තිබේ. අප ඒ දෙකම අගැයීමට පුරුදු විය යුත්තෙමු.

11, 12, දහතුන, 14

නමය නපුරු යයි නොකියන සමහරුන්ට 13 පෙන්නන්නට බැරි ය. ඔවුන් 13 සළකන්නේ අවාසනාවන්ත සංඛ්‍යාවක් ලෙස ය.

මෙහි ආරම්භය යේසුස් වහන්සේගේ අවසාන භෝජන සංග්‍රහය වෙතැයි සැළකේ. කුරුසියේ ඇණ ගැස්වීම තෙක් දිව ගිය ඒ අවසන් භෝජන සංග්‍රහයට 13 ක් සහභාගී වුනේ යැයි කියනු ලැබේ. බැරි වෙලාවත් එදා හිටියේ දොළහක් නම් වැඩේ සෙට් වෙන්නේ දොළහට ය.

තලවතුගොඩ වික්‍රමසිංහපුර පටුමං ගණනාවක් තිබේ. 12 වෙනි පටුමගට පසු තිබිය යුත්තේ 13 පටුමග වුව ද එහෙම අංකයකින් පටුමගක් එහි නැත. 13 පාර නම් කර ඇත්තේ ධර්මපාල මාවත කියා ය. ඊට පස්සේ ඇති පාර 14 වෙනි පටුමග ය.

සමහර රටවල හෝටල්වල 13 තට්ටුවක් තිබෙතත් වික්‍රමසිංහ පුර තර්කයට අනුව එ්වා 13 තට්ටුව ලෙස නම් නම් කරන්නේ නැත. සමහර හෝටල් කාමර ද. නම්  කර ඇත්තේ 13 මග හැරෙන ලෙස ය.

එයින් පෙනී යන්නේ ප්‍රශ්නය ඇත්තේ දහතුන් වෙනි එකේ නොව එලෙස නම් කරන ඒවායේ බව ය. එයින් පේන්නේ අවාසනාව නම් හොයා ගෙන යන බව ය.

ඇපලෝ අභ්‍යවකාශ යානා අභ්‍යවකාශ ගත කළ නාසා ආයතනයේ ඉන්නේ විද්‍යඥයින් ය. මිනිසුන් හිනස්සන්නට බැරි නිසා ඔවුන් ඇපලෝ 13 මග හැරියේ නැත. එහෙත් වුනේ අභාග්‍යයකි. එහි පිපිරීමක් ඇති විය. ගගනගාමීන් අනතුරට පත් නොවුනේ වුව ද 13 අවාසනාවන්ත අංකයක් බව විශ්වාස කළ අයට එයින් තවත් සාක්කියක් ලැබුනේ ය.

13 නම ඇති බොහෝ සාර්ථක වූ දේවල තිබුන ද එ්වා මග  හරින ඔවුන්ගේ මනස යන්නේම 13 නම ඇතිව අසාර්ථක වූ ඒවා සොයාගෙන ය. එහෙම එවා හොයාගන්නට බැරිකමක් ද නැත. ඉතින් සොයන්නාට සම්බවෙන කරුණු සංඛ්‍යාලේඛන ද ගෙන 13 නපුරු යැයි පෙන්නන අයට ශ්‍රාවක පිරිසක් ඇතිවේ. එවැනි දෑ පදනම් කර ගෙන ගොඩ නැගුණු අංක විද්‍යාවක් (විද්‍යාවක්! ඔව්, විද්‍යාවක්) ද පවතී. සුභ අසුභ ඉලක්කම් ගණන් මේ මේ යැයි එයින් දැන ගත හැකි ය. එම විද්‍යාවට අනුව 13ට ඇත්තේ කුමන තැනක් දැයි යන්න ගැන අවබෝධයක් අපට නැත.

13 ගැන අප දන්නා වැදගත්ම දේ එය අප රටේ අතිමහත් බහුතරය සහභාගි වන උත්සව දවසකට සම්බන්ධ බව ය. පවුලේ හැම එක්කරන සිංහල දෙමල අලුත් අවුරුද්ද වැටෙන්නේ අප්‍රියෙල් මාසේ 13 හෝ 14 දිනයන්ගෙන් එකකට ය.

එය නම් අවාසනාවන්ත යැයි කියනු අප අසා නැත. අවුරුද්ද වාසනාවේ උත්සවයකි. වාසනාව සමරන උත්සවයකි. එවන් උත්සවයක් මහ ඉහළින් සමරණ අයම එසේ කරන ගමන් 13 මග හරින්නට හදන්නේ මන්දැයි පැහැදිලි නැත.

වචන සෙල්ලම් කියා ලොකුවට ලියා පටන් ගත්තාට අන්තිමේ ලියවෙන්නේම ඉලක්කම් සෙල්ලම් ගැන ය. සමාවෙන්න, ඊළගට ලියන්න යන්නේ ද ඉලක්කම් ඇතුළත් සංඛ්‍යාවක් ගැන ය. සෙල්ලම් කරන්නට හැකි නම් වචන මොකද ඉලක්කම් මොකද?

නමය නපුරු ද?

සමහරු විශ්වාස කරන විදිහට නමය නපුරු ය. මිනිසුන්ට නපුරු විය හැකි වුව ද ඉලක්කමකට නපුරු විය හැක්කේ කෙසේ දැයි මට නම් තේරෙන්නේ නැත. ඒ සමහර විට මගේ මොළය කුඩා නිසා විය හැකි ය. මොළය අඩු අයට ගණනුත් බැරි යයි කවුදෝ කියනු මා අසා තිබේ. නමය ඉලක්කමකි. ඉලක්කම් අයිති ගණන් වලට ය.

ඉලක්කම් වල අවසානය සටහන් කරන්නේ නමයෙනි. ඊළගට එළඹෙන දහයට තමන්ගේම ඉලක්කමක් නැත. එහෙම බැලුවහම නමය ගාම්භීර ය.

නූලෙන් බේරුණාම කියන්නේ අනූනමයෙන් බේරුණා කියලා ය. අනූනමයට නමයේ ඉලක්කම්ම දෙකකි. එහෙම බැලුවහම නමය වාසනාවන්ත විය යුතු ය. අනූනමයෙන් බේරීමට හැබෑ ලෙස වාසනාව තිබිය යුතු ය. එහෙව් නමය නපුරු යයි කියන්නේ මොන හිතකින් ද? සමහර වෙලාවට මිනිසුන්ගේ කතා තේරුම් ගැනීමට බැරි ය. ඒ තරමටම පරස්පර ය.

හය ඔලුවෙන් හිටගත්තහම පෙනෙන්නේ නමය වගේ ය. නමය ඔලුවෙන් හිටගත්තහම හය වගේ ය. ඉලක්කම් අතරින් එහෙම ඔරොප්පුවට ඉන්නේ හය හා නමය පමණ ය. හයට පෙනෙන එකෙහි ප්‍රතිවිරුද්ධය නමයට පෙනෙන කල ඒ දෙන්නා අතර සාම්‍යයක් ඇති විය හැක්කේ කෙසේ ද?

හය ආවේ නමයට ඉස්සෙල්ලා ය. ඉස්සෙල්ලා එන එකට අප කොහොමටත් ලව් ය. පරණ ඒවා අගය කරමින් උඩ දමන අපි අලුත් ඒවා දිහා වපරැහින් බලන්නේ ඒ නිසා විය යුතු ය. හය හොඳවී නමය නරක් වන්නේ ඒ තර්කයට අනුව ය.

නමය නපුරට පෙනෙන්නේ මේ ඔරොප්පුව නිසා වෙන්නටත් පුලුවන. එහෙම කල්පනා කරහම නම් වැරදී ඇත්තේ මට ය.
මට වැරදෙන්නට බැරි ය. කොහොමටත් බැරි ය. වෙන්නට නම් බැරි ය. අප ජීවත්වෙන්නේම මට වරදින්නට බැරි ලෝකයක ය. ඔබ ඒ බව නම් පිළිගන්නවා ඇත. වැරදී ඇත්තේ අනිත් අයට ය.

ඒ නිසාම නමය නපුරු නැති බවත් නමය මෛත්‍රී සහගත බවත් මම ඔලුවෙන් හිටගෙන කියමි.

දැන් ඔබ කළ යුත්තේ ඒ කතාව විශ්වාස කිරීම ය. එසේ කළ යුත්තේ මම ඒ බව ඔලුවෙන් හිටගෙන කියන නිසා පමණක් නොවේ. රට දෙවනත් වෙන්නට කෑගසමින් අතිශය ගාම්භීර ලෙස එය මේ මොහොතේ තහවුරු කරමින් ඉන්නා නිසා ය. එවැනි සද්දයක් අභියස ඔබ නගන කෙදිරිය ඇහෙන එකක් නැත.

නමය නපුරු නැත. එය සුන්දරය. වාසනාවන්ත ය. මම නැවත නැවතත් කියමි. උදේ හවස කියමි. දත් මදින විටද කෑම කන විට ද ඇදුම් මදින විට ද කියමි. රූපවාහිනියෙන් ද පත්තර වලින් ද ගුවන්විදුලියෙන් ද කියමි. දැන් නම් ඔබට ගැලවීමක් ඇත්තේම නැත.

පිළිගන්න. මෙයයි සත්‍යය. එකම සත්‍යය. පෙරා හදාගත් පරම සත්‍යය. ඉතිරි සියල්ල බොරු ය. නමය නපුරු නැත. එය වාසනාවන්ත ය.

(ඉලක්කමකට නපුරු විය නොහැකි වාක් මෙන්ම එයට මෛත්‍රී සහගත වීමට ද නොහැකි බව කියන්නට සමහරු උත්සහ කරන බව පෙනේ. බරපතලම රෝගය අවිශ්වාස කිරීම ය. බරපතල ලෙස විශ්වාස කරන්න. ඔබේ ඔලුවට එන ප්‍රශ්නවලට නම් ඔබව පාලනය කරන්නට ඉඩ දෙන්න එපා! දැන් හරි ය?)