පිරිතේ බලය

මගේ මිතුරෙකු මූණු පොතේ දමා තිබූ වීඩියෝ පටයකින් පෙන්නුම් කළේ පිරිත් සජ්ජායනයක් අතර තුර දී ඒ ඉදිරිපිට ඇති පාත්‍රයක බහා ලූ වතුර ඒ මේ අත නටන ආකාරය යි. කැප්ෂන් එක පිරිතේ බලය ය. මේ සටහන දුටු මට ඇති වූ ප්‍රශ්න ගණනාවකි.

පළමු ප්‍රශ්නය, මෙය ෆොටෝ ෂොප් වැඩක් විය නොහැකි ද යන්න ය. දෙවැන්න, මෙය ඇස්බැන්දුමක් විය නොහැකි ද යන්න ය. තෙවැන්න, කෙනෙකුට අතින් පහසුවෙන් සෙලවිය හැකි ජල බඳුනක් සෙලවීමට පිරිතක් අවශ්‍ය කරන්නේ ඇයි ද යන්න ය. එය සුවිශේෂී බලයක් වන්නේ කෙසේ ද යන්න ය. අපට කළ නොහැකි යමක් කරන්නට සමත් වේ නම් විශේෂ බලයක් සේ සැලකිය හැකි මුත් අපට පහසුවෙන් කරන්නට හැකි දෙයක් කිරීම මට විශේෂයක් හැටියට නොදැනෙන බැවිනි. පිරිතකින් කෝවිඩ් රටින් තුරන් කළ හැකි නම් අන්න එවිට එය සුවිශේෂි බලයක් හැටියට ගත හැකි ය. භාජනයක ජලය හෙලෙව්වාට එහෙම හිතෙන්නේ නැත.

සිව්වෙනුව, මේ ආරංචිය බෙදා ගැනීමෙන් එසේ කරන අය අපේක්ෂා කරන්නේ කුමක් ද යන්න ය. මිනිසුන්ට පිරිත් පැන් විකිණීමට ව්‍යාපාරයක් පටන් ගැනීමට ද? පිරිත් පැන් බෝතල් කරන ව්‍යාපාරයක් ඇරඹුනේ දෙවැනි කෝවිඩ් රැල්ලත් සමග ය.

ඒසේත් නැතිනම් පිරිතේ ඇති බලය පෙන්වා බුදු දහමට මිනිසුන් දිනා ගැනීම ද? අපේක්ෂාව දෙවැන්න නම් එතැන ඇත්තේ බරපතල ගැටළුවකි. බුදුන් කීවේ තමන්ට තමන් මිස පිහිට විය හැකි අමතර බලවේගයක් ලොව නැති බව ය. මා දන්නා තරමින් අත්තාහි අත්තනෝ නාථෝ ගාථාවේ මුඛ්‍ය අර්ථය එය ය. එසේ තිබිය දී වෙනත් අමතර බලවේගයක් පිළිබඳ බලාපොරොත්තු රැඳවීම කොතෙක් දුරට ධර්මයට එකඟ ද?

පස්වෙනුව, මෙවැනි අමුතු ප්‍රාතිහාර්යයන් ගැන ආරංචි අපට ගෙන එන්නේ බෞද්ධයින් පමණක් නොවේ. වෙනත් ආගම්වල ප්‍රචාරක මධ්‍යස්ථාන ද මේ වැනි ම දේ කරති.

ඒ සියලු වැඩ නන්ද කුමාරයාව දෙව්ලොව ගෙන යන අතරමග දී දා ගිය හේනක වැඳිරියක දකින්නට සලස්වනවා වැනි බාල වැඩ ය. ධර්මයට සාහිත්‍ය සමග ආනුපාන එක් කරන අය ප්‍රවේසම් විය යුත්තේ එයින් සැබෑ ධර්මයට අවැඩක් විය හැකි නිසා ය. රැවටීම කිසිදු ආගමකට ආභරණයක් නොවන නිසා ය.

මා සාකල්‍යයෙන්ම ශ්‍රී ලාංකික ය

Sathya Sai Baba - Wikipedia

(මෙහි සඳහන් මම මා නොවේ. ඇතැම් විට ඔබ විය හැකි ය. එහෙත් අප අතර මෙවැනි මම ලා නම් බොහෝ ය.)

මම කන්දෙ විහාරයට යමි. ඒ වසරකට සැරයක් කතරගම දේවාලය වඳින්නට යන අතරමග ය. මම කොච්චි කඩේ පල්ලියට ද යමි. කෝනේෂ්වරම් දේවාලයට ද යමි. සල්ලි බාගය තියෙන කලක තිරුපති වඳින්නට ද හිතාගෙන සිටිමි.

සායිබාබාගේ පින්තූරයක් මගේ නිදන කාමරයේ ඇත. සීවලී හිමියන්ගේ පින්තූරයක් මගේ ප්‍රධාන දොර උඩින් බැබලි බැබලි තිබේ. ගණ දෙවියන් සරස්වතිය හා ලක්ෂ්මී සමග වැඩ ඉන්නේ සාලයේ ය. ඊට තරමක් නුදුරින් තියෙන්නේ කතරගම, විෂ්ණු හා සමන් දෙවියන්ගේ රූප ය. බුදු හිමියන් ඉන්නේ එලියේ තිබෙන බුදු මැදුරේ ය.

මගේ අතේ පිරිත් නූල් ය. ඇඟිල්ලක නවරත්න මුද්දකි. බෙල්ලේ සුරයකි.

හොඳ වැඩකට යන්නේ නම් රාහු කාලය මම කෙසේ හෝ මග හරිමි. ඇතැම් දිනෙක ඒ වෙනුවෙන් කලින් පිටත් වන නිසා අතරමග රස්තියාදු ගැසූ දවස් එමට ය. යහපත් ගමනක් යන අවස්ථාවක හාමුදුරු නමක් හෝ හිඟන්නෙකු මුලිච්චි වුනේ නම් මම ගමන පමා කරමි. ඒ දෙන්නා එකම කුලකයකට දැම්මේ ඇයිදැයි යන ප්‍රශ්නය බක පණ්ඩිතයෙකු විසින් නොනගන්නට මගේ හිතට කවදාවත් ඇතුළු වන එකක් නැත. ඒ පණ්ඩිතයෝ පොළොවේ පයගහලා ඉන්නා අය නොවෙති.

යන ගමනක් අතරමග තිබෙන කිසිදු දේවාලයක් ළග නොනවත්වා යන සිරිතක් මගේ නැත. පඩුරු දැමීම අත්හැරීමට මගකි. හැබැයි මා කැමති වැඩිපුර කාසි දැමීමට ය. ඒ සලාං යන සද්දයෙන් ඒවා වැටෙන නිසා ය. කුඩා කල මා ආසාවෙන් කළේ ඒ සද්දය ඇසීමට සලස්වා උඩ පැනීම ය.

කුල්ල කනප්පුව කරකවන තැනකට මා යන්නේ ඇතැම් අභිරහස් සොයා ගැනීමට ය. නැති වූ දෙයක් ලබා ගැනීමට ය. මා හෝ පවුලේ කෙනෙකු අසනීප වූ විට පඩුරක් බඳින්නට මෙන්ම බෝධිය කිරි කලකින් නාවන්නට ද යොමු වන්නේ නිතැතිනි.

කේන්දරය බලවා ගැනීමට මතුවන පුංචි ප්‍රශ්නයක් සෑහෙන්නේ ය. කේන්දර කාරයා කියන්නේ නම් බලු කපුටු දානයක් දෙන්නට, ග්‍රහ පූජාවක් කරන්නට, සෙත්කවියක් කියන්නට, මා පසුබට වෙන්නේ නැත. අනාගතය ගැන කියන අහිකුණ්ඨික ගෑණියකට අත පිරිනමන්නට මගේ කුලමල වෙන තැන්වල දී මෙන් මට හරස් වන්නේ නැත.

වාස්තු විද්‍යා ශාස්තෘ කෙනෙකු කියන්නේ නම් ගෙය දහ පහලොස් වතාවක් කඩා හදන්නට මා පසුබට වෙන්නේ නැත. සමහර ප්‍රශ්න ඇත්තේ ග්‍රහ පිහිටීමේ වන අතර තවත් සමහර ප්‍රශ්න ඇත්තේ ගෙදර ජනෙල් දොවල් පිහිටීමේ යැයි මම උදක්ම විශ්වාස කරමි.

මගේ මෝටර් රථය නවීන ජපන් තාක්ෂණයෙන් යුක්ත වුව ද එය විවිධ පරීක්ෂාවලට යටත් කොට ආරක්ෂාව තහවුරු කර තිබෙන්නේ යැයි කියන්නේ වුව ද එහි මුල්ම ගමන සඳහා කතරගමට යෑමටත් එහි පසුපස හා ඉදිරියෙන් දෙහිමිරිස් ආරක්ෂාවක් පැලඳීමටත් මා දෙවරක් සිතන්නේ නැත.

කුඩා කල මා මැර වැඩ කළේ වුව ද දහම් පාසල් ද ගියෙමි. මා මත්පැන් ටිකක් තොල ගාන්නේ වුව ද අල්ලපු ගෙදර ගෑණු ළමයා සමග බිරිඳට හොරෙන් පයුරු පාසානම් පවත්වන්නේ වුව ද පන්සිල් පද පහ දිනපතාම ගන්නෙමි. ධර්මයේ  හැටියට ජීවත්වන්නට මට තරමක් අපහසු වුව ද මම නිතිපතා බණ අහන්නෙමි. මාස කීපයකට වරක් ධර්ම දේශනාවක් සංවිධානයක කිරීමට ද දානයක් දීමට ද මම නොමසුරු වෙමි.

කවුරුවත් මගේ ජීවිතය ගැන, විශ්වාස ගැන, ප්‍රශ්න කරන්නට වුවමනා නැත. ඒවායේ තුන්හුලස් හොයන්නට ඕනෑ නැත. ඒ මගේ හැටි ය. මා සාකල්‍යයෙන්ම ශ්‍රී ලාංකික ය. ඔබට බුදු සරණ ය.

English translation is given as a comment below.