මහෞෂධ පඩිතුමනි – ඔබටයි මේ ආරාධනා..

මහෞෂධ පඩිතුමනි

ඔබ කුමක්දෝ දණ්ඩක් සමග උපන් බව කියන උම්මග්ග ජාතකය මම කියවූවෙමි. ඒ දණ්ඩේ කතාවෙන්ම කියවුනේ ඔබේ ජාතකය පවා ඉහළ බව ය. ඔබ උත්පත්තියේ සිට ම නුවණින් ආඪ්‍ය බව ය. සේනක නම් ඊනියා පඩිවරයා ඉදිරියේ ඔහු හිරු දුටු කදෝ පැණියක් කිරීමට ඔබ සමත් වූ බව ය. ඔබව නිර්මාණය කළ ඒ කතා කාරයා දක්ෂයෙකි.

ගුරුවරුන්ට ද අකුරු වරදිතැයි කියන කියමන සැබෑ කරමින් ඔහු ඇණ ගන්නේ ඔබට අමරා දේවිය මුණ ගස් වන තැනේ දී ය. සස්වාමික ද අස්වාමික දැයි අසා දැනගැනීමෙන් පසු ඔබ කළ කී දෑ මිනිහෙකුට තරම් නොවන බව විපරමින් බලන මට නම් පෙනේ.

හාල් පතක්‌ (හුණ්‌ඩුවක්‌) ගෙනැවිත්දි එයින් කිරිබතක්‌ හා අග්ගලා හදා තබන්නැයි ඔබ ඇයට නියෝග කළේය. අමරා දේවිය ඒ දෙකම ඉටුකර තැබීය. අහර මුවගට ගත් සැනින් රස නහර පිනා ගියත් ඒවා නීරසයෑයි චෝදනා කොට ඉවත ලෑවේය. මා අසා ඇති කතාවේ හැටියට ඒ නිකම් නොවේ. ඒ ආහාර අඹරා සදාගත් තලපයක් හිස සිට දෙපතුළ දක්වා ගා අව්වේ ඉන්නැයි නියෝග ද කරමිනි. අමරාදේවිය ඒ සියල්ල ඉවසුවාය.

ඒ කතාවට අනුව ඔබ සොයා ඇත්තේ ඔබ හා දිවි මග යෑමට ඔබට ද උදව් කළ හැකි ගමන් සගයෙක් නොවේ. අතිශය දීන වහලියකි.

ඔබේ අධිමානය සහිත ඒ චර හැසිරීම ඉදිරියේ මුණිවත රැකීම ගැහැණියක සතු උදාර ගුණයක් ලෙස කවුරු කල්පනා කළ ද මට නම් හිතෙන්නේ එය දීන කමක් බව ය. නිවට කමක් බව ය.

තමන්ගේ අයිතිය වෙනුවෙන් යුක්තිය වෙනුවෙන් නැගී සිටීමට අසමත් කෙනෙක් පසුබානා කෙනෙක් සහකාරිය හැටියට තෝරාගැනීම තුළ මේ කතා කාරයා ඔබ පිළිබඳව අඳින චිත්‍රය නුවණක්කාරයාගේ චිත්‍රයක් ලෙස මට නම් ගත නොහැකි ය.

කතාකරුවා මේ සිද්ධියේ දී ඔබ පින්තාරු කර ඇත්තේ එක් පැත්තකින් බොරු කාරයෙකු ලෙස ය. අහර රස නහර පිනා යෑමට සමත් වූයේ වුව ද එසේ නැතැයි කියමින් ඔබ ලවා ඔහු බොරු කියවන්නේ ය. ඊලගට ඔහු ඔබ සිත්තම් කරන්නේ අමානුෂික හිංසකයෙකු ලෙස ය. ඔබේ උපදෙස් අනුව ඇයට හැකි ඉහළින් අයුරින් නිපදවන ලද ආහාර ප්‍රතික්ෂේප කරමින් නොනැවතී ඒවා ඇගේ ගල්වා අව්ව තපින්නට අමරාට ඔබ කියන විට මට දැනෙන්නේ 21 සියවසේ සරසවියක සිදු වන නවක වදය ඒ කාලයේ ද සිදු ව ඇති බව කි. නුවණක්කාරයෙකු බොරු කාරයෙකු වී අවසානයේ හිංසකයෙකු බවට පත්වන විට ඒ නුවණ ගැන මට ඇතිවන්නේ සැකයකි. සරසවික නවක වදය දෙන ජේෂ්ඨ උත්තමයන්ගේ නුවණ ගැන ඇතිවන සැකයට සමාන සැකයකි.

මේ කතාවේ අමරා දේවියට, ඔබට හා කතුවරයාට බරපතල ලෙස වැරදී තිබේ. ඒ ඓතිහාසික වැරැද්ද දැන්වත් නිවැරදි කළ යුතු ය. මේ මියගිය අතීතය හාරා ඇවිස්සුවේ ඒ සඳහා ය.

එසේ නොකළොත් වන්නේ බෞද්ධ සාහිත්‍ය බුදුන්ගේ දර්ශනය හෝ බුදුන්ගේම වචනය ලෙස ගන්නා අපේ උපාසක උපාසිකාවන් විසින් දීනත්වය ශ්‍රේෂ්ඨත්වයට නැංවිය හැකි නිසා ය. හිංසනය අමන කමක් නොව උද්දාමයට කරුණක් ලෙස ගත හැකි නිසා ය. බොරු කියන්නේ ගැහැණියක් පරීක්ෂා කිරීමට නම් එය මුසාවාදයක් නොවේ යැයි සිතිය හැකි නිසා ය.

මහෞෂධ පණ්ඩිතයෙනි, ඒ නිසා ඔබ දැන්වත් කතා කළ යුතු ය. ඔබ ඇත්තටම අර කී අපරාධය කළේ නම් පාපෝච්චාරණයක් කොට සමාව ගත යුතු ය. අමරා දේවියගෙන් පමණක් නොව ගැහැණු සංහතියෙන්ම සමාව ගත යුතු ය. කතුවරයා ඔහුගේ මනස්ගාත තහවුරු කර ගැනීමට ඔබව පාවිච්චි කළේ නම් ඒ බව ලෝකයට කියා දැන්වත් ඔබ නිදහස් විය යුතු ය.

ප්‍රශ්නය ඇත්තේ යුක්තිය පමා වීම ගැන නොවේ. මෙය තවම ඉටු නොවීම ගැන ය. දැන් ඊට කාලය යි.

 

Advertisements

One thought on “මහෞෂධ පඩිතුමනි – ඔබටයි මේ ආරාධනා..

  1. අමරාදේවිය ඇත්ත වශයෙන්ම දීන චරිතයක් බව තහවුරු කරගන්න කරපු පරීක්ෂනයක් වෙන්න බැරිද? එවැනි පරීක්ෂන පවා සදාචාරාත්මක නැති බව පිළිගනිමි

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s